O Pazo dos Deportes de Lugo volveu converterse nun espazo de encontro entre xeracións cunha nova sesión do programa Pazo Aberto, desta vez coa visita dos nenos e nenas do Colexio Cervantes. Unha mañá diferente, na que o baloncesto serviu tamén como fío condutor para falar de historia, valores e identidade.
Nesta ocasión, o proxecto Memoria Celeste contou con dous convidados moi especiais: David Salgado e Manolo Miranda, dúas figuras moi vinculadas ao deporte lucense e á traxectoria do CB Breogán, cada un desde un camiño distinto pero cun mesmo sentimento de pertenza.
DAVID SALGADO
David Salgado formou parte do CB Breogán como xogador durante a década dos anos 70 e nos comezos dos 80, nunha etapa clave para entender o crecemento do club e a consolidación do breoganismo. Ademais, foi tamén un dos fundadores da peña Boinas e Zocas, un símbolo do apoio incondicional da afección e da maneira tan singular que ten Lugo de vivir o baloncesto.
A súa presenza nesta visita foi unha oportunidade para lembrar como se construía o Breogán daqueles anos: con traballo, con ilusión e cunha relación moi directa entre equipo e bancada, cando o club empezaba a escribir as súas primeiras páxinas máis recoñecibles.
MANOLO MIRANDA
Manolo Miranda é unha das persoas imprescindibles para comprender o deporte lucense desde unha visión máis ampla. Considerado o alma mater do rugby en Lugo, foi profesor de Educación Física, seleccionador galego absoluto de rugby en varias ocasións e, no ámbito do baloncesto, desenvolveu un papel moi relevante como preparador físico do CB Breogán na ACB, asumindo esa responsabilidade tras Suso de la Torre nos últimos anos do século XX e comezos do XXI.
A súa traxectoria representa a profesionalización, o coñecemento e o compromiso co deporte como ferramenta formativa, e permitiu ao grupo coñecer tamén esa parte esencial que moitas veces non se ve: o traballo físico, a preparación e a constancia que hai detrás dun equipo de elite..
Ao longo da visita, os escolares puideron escoitar historias, vivencias e reflexións que axudan a entender que o Breogán non é só un club: é unha comunidade, unha maneira de sentir e un legado construído durante décadas por xogadores, profesionais e afeccionados.
A presenza de David Salgado e Manolo Miranda reafirma a vontade de Memoria Celeste de dar voz aos protagonistas da historia do Breogán e de achegar ese legado ás novas xeracións desde a experiencia, a memoria e o sentimento de pertenza.
