PROXECTOS 2023
NINGÚN ARO SEN REDE (En curso)
Ningún aro sen rede é un proxecto da Fundación Breogán en colaboración coa UNED Lugo e ECOBALLUTION. Iniciouse co curso escolar 22/23 e nace cun claro obxectivo, acadar as sinerxias necesarias para proveer a aqueles centros escolares que o demanden de redes de baloncesto artesanais, recicladas e sostibles.
LUZ Ó DEPORTE (En curso)
Segunda edición deste proxecto no que volvemos a traer a Lugo a deportistas e exdeportistas de primeiro nivel que contarán as súas experiencias vitais.
Todo aquelo que por norma xeral non é coñecido pola gran maioría da sociedade e que resultará de gran interese polo que lles pode aportar á educación dos nosos rapaces e rapazas máis novos.
FUNDACIÓN BREOGÁN DIVERSIA (En curso)
Dende a Fundación Breogán e da man de Xuncas Diversia, buscamos sentar as bases para formar un equipo de baloncesto en cadeira de rodas.
Os adestramentos teñen lugar no Complexo Deportivo de Frigsa, son de carácter semanal e contan coa dirección de José Manuel Teijido e Salva Arco.
O proxecto é posible grazas ao convenio da Fundación Breogán coa Área de Deportes da Excma. Deputación de Lugo.
PROXECTO PERSOAS (En curso)
Proxecto social e inclusivo que responde á necesidade de ofrecer actividades relacionadas ca práctica deportiva, no noso caso o baloncesto, a persoas menores de idade con discapacidade que actualmente non dispoñen de ningún tipo de oferta neste sentido.
O proxecto é posible grazas ao convenio da Fundación Breogán coa Área de Deportes da Excma. Deputación de Lugo.
FASE PREVIA MINI COPA ENDESA (En curso)
Por terceiro ano consecutivo, unha selección de xogadores dos principais clubs da provincia de Lugo, representarán ao C.B. BREOGÁN e á FUNDACIÓN BREOGÁN nesta prestixiosa competición de nivel estatal.
MÁIS QUE BASKET NO RURAL
Nova edición do proxecto que pretende achegar todolos beneficios dun deporte como o baloncesto ó rural da provincia de Lugo.
Tan só queda unha praza dispoñíbel para este ano.
Os responsables municipais que desexen que o seu Concello participe nesta actividade revitalizadora do rural e dos hábitos de vida saudables, ainda están a tempo de facelo en:
info@fundacionbreogan.org
Coma sempre, iremos da man das nosas empresas benefactoras Pazo de Vilane e Río de Galicia.
EXPERIENCIA BREOGÁN (En curso)
Un dos proxectos sociais máis especiais da Fundación Breogán. Cinco organizacións, fundacións, etc. serán as afortunadas en vivir, durante este 2023, a triple actividade que conforma este proxecto.
Destinaremos unha semana para cada unha delas. Invitarase ós seus membros a vivir a EXPERIENCIA PAZO (tour polas instalacións e convivencia cos xogadores), logo será unha representación do CB Breogán e da Fundación Breogán quen visite o seu centro de traballo e por último, estarán convidados ó día de partido, aproveitando o stand do EsPazo Fundación para dar visibilidade ó seu colectivo.
II TORNEO 3X3 NA RÚA (Rematado)
Arredor de 100 rapaces e rapazas, con idades comprendidas entre os 9 e os 18 anos, encheron as pistas exteriores do Pazo dos Deportes de Lugo un ano máis.
O segundo Torneo 3X3 Na Rúa da Fundación Breogán foi posible grazas ao convenio coa Excma. Deputación de Lugo e ás nosas empresas benefactoras.
DEPORTE NA RÚA (Rematado)
Proxecto deportivo e social que pretende poñer en valor alternativas de ocio saudables para rapaces/as entre 10 e 17 anos.
Visitamos 3 barrios de Lugo, fomentando a práctica deportiva grazas a 3 deportes de gran impacto en Lugo: baloncesto, voleibol e fútbol sala.
II LIGA SENIOR 3X3 (Rematada)
Nova edición da Liga Senior (maiores de 30 anos) da competición de moda do baloncesto, o 3X3.
Unha liga que se disputou durante os meses de maio e xuño, e que volveu a resultar un éxito total, con máis equipos inscritos, máis competicións e máis BALONCESTO.
O proxecto é posible grazas ao convenio da Fundación Breogán coa Área de Deportes da Excma. Deputación de Lugo.
ENCESTA CON NÓS (Rematado)
Xornadas de tecnificación de tiro, dirixidas por SALVA ARCO e ALBERTO CORBACHO na pista principal do Pazo dos Deportes de Lugo.
O proxecto está organizado pola Fundación Breogán e incluído dentro do plan CORRESPONSABLES da Universidade de Santiago de Compostela.
XORNADAS DE TECNIFICACIÓN (Rematadas)
Xornadas de tecnificación de baloncesto que se levaron a cabo os días 3, 4 e 5 de abril de 2023, polos mellores profesionais do C.B. Breogán e da Fundación Breogán, para rapaces/as de entre 8 e 16 anos.
I TORNEO 3X3 TOUR TALENTO (Rematado)
Evento deportivo organizado polo CONCELLO DE LUGO, baixo a coordinación da Fundación Breogán e o C.B. Breogán.
Incluído dentro da prestixiosa xira anual "TOUR DEL TALENTO", da Fundación Princesa de Girona, que percorre diferentes cidades españolas con múltiples eventos enfocados a que a xuventude poida construir o seu futuro profesional.
DOAZÓN BENÉFICA
Un dos obxectivos principais da Fundación é ESTAR. Estar ao carón dos que máis o necesiten, estar cos nenos e nenas, estar cos nosos maiores, na educación dos adolescentes, estar na cidade e no rural, estar na promoción de eventos deportivos, etc.
E tamén imos ESTAR ao voso carón. Por isto, imos realizar, anualmente, unha doazón económica á entidade que os nosos socios benefactores da Fundación decidan.
